做得賭王何鴻燊身邊嘅女人，絕非等閒之輩，好似四太梁安琪（圖右一）咁，唔止要照顧賭王同幾個仔女，仲要幫手打理家族生意。為爭取時間，四太連開會都捨遠就近，揀位於中環置地廣場三樓嘅Cafe。早前一個星期四下晝三點幾，卓妮撞到四太喺嗰度歎下午茶，同枱仲有四位同事，似乎係傾緊公事。傾足一粒鐘後，四太埋單走人，佢同卓妮講，專登揀呢度開會有原因，貪地點夠就腳近直升機場，開完會就飛澳門，快靚正！
