中環出更：柯清輝太太錫晒契女
早前電子業商會舉行慶祝三十周年晚宴，中策集團行政總裁柯清輝同太太拍拖到場，柯太一見電子業商會司庫、時捷集團主席嚴玉麟嘅太太同囡囡嚴紀雯（Carmen），就雞啄唔斷，三人細聲講大聲笑，不知幾開心。
講開至知，原來柯太係Carmen嘅契媽，兩人上咗契幾年。講起上契嘅因由，柯太笑謂，佢有三個兒子，但冇女兒，佢同嚴太相識多年，收埋Carmen做契女，咪圓咗呢個夢囉！佢盛讚契女好乖，Carmen聽完笑到甜絲絲。
其實Carmen同賭王四太囡囡超盈分屬朋友，上個月超盈趁港大開學前，特登約咗Carmen同嚴太喺中環Cafe Landmark飲下午茶，被卓妮撞到正。Carmen話，佢依家喺一間公關公司做嘢，累積社會經驗後，明年就會返英國讀短期課程，跟住完成大學最後一年嘅課程。小妮子對自己嘅未來咁有計劃，唔怪得契媽咁落力讚佢。