中環出更：安德魯王子訪港 滙豐酒會歡迎
英國約克公爵安德魯王子尋日訪港，英資龍頭大行滙豐銀行尋晚喺中環總行四十一樓搞私人雞尾酒會，歡迎呢位遠道而來嘅貴賓。現場所見，獲邀出席酒會嘅嘉賓約有五十人，九成都係外籍人士，而且大多係西裝筆挺嘅生意人，好似有中電主席米高嘉道理、有「蘭桂坊之父」稱號嘅海洋公園主席盛智文同馬會行政總裁應家柏咁，大家同聲同氣，打成一片。
安德魯王子以英國國際貿易及投資特別代表身份訪港，此行目的係促進英港商業投資關係，行程自然唔少得同香港商界碰頭啦。滙豐歡迎安德魯王子訪港嘅私人酒會喺傍晚六點開始。五點半左右，港府保護要人組（G4）開始喺附近主要通道同商場來回巡邏「掃雷」，保安唔敢怠慢。到六點四十分，安德魯王子由大約十名G4簇擁保護下，由文華東方酒店一路經行人天橋，沿太子大廈、渣打銀行，直達進入滙豐總行，身旁G4前呼後擁，戒備森嚴，一派皇室成員出巡氣勢，吸引途人注目。
五十賓客出席
酒會七點三十分結束，安德魯王子經原路返回酒店，其後酒會賓客亦魚貫離開。英國皇室成員嘅私人酒會，外人不得越雷池半步，應家柏同卓妮講，出席賓客約五十人，以生意人為主，安德魯王子喺儀式中作簡短發言，談及英國同香港嘅關係。卓妮問應家柏係咪第一次見安德魯王子，先知原來佢哋五、六年前喺英國早已認識，只係尋日酒會人多，應家柏未有機會同王子打招呼。
安德魯王子今次訪港，重點推廣英國喺建築、設計同工程，尤其係金融服務業嘅優勢，所以尋日下午已經率先會晤本港部分大地產商，留港期間仲會見煲呔曾同財政司司長曾俊華，又會出席英商會午餐會，與英港商界領袖同退伍軍人協會代表會面，行程相當緊湊。
卓妮