鄉議局副主席兼坪洲鄉事委員會主席林偉強（We Wet強）呢兩年是非不絕，事件或會影響明年鄉委會換屆選情。不過，唔使等到明年，本月廿四日坪洲選舉十七個街坊代表，We Wet強有幾多支持者當選，直接影響明年鄉委會選情。
據聞坪洲鄉委會有挺強派（黑衫）及倒強派（黃衫）兩股勢力正在角力，雙方為爭取勝出最多街坊代表，各派出十七人參選，而且兩邊形勢更係各佔一半，所以最近已密密展開拉票活動。據知情人士透露，如果We Wet強嘅支持者在選舉中失勢，明年就難以連任鄉委會主席，自然不能以當然議員嘅身份進身離島區議會，當然區議會主席都要換人啦！
如果We Wet強做唔到坪洲鄉委會主席，就要只能以太平紳士身份進身鄉議局，到時無咗鄉委會，又唔係村代表，係咪有人支持佢再做鄉議局副主席都成問題。早前鄉議局新大樓上樑儀式咁大件事，We Wet強都缺席，激到主席劉皇發紮紮跳，發叔到時係咪撐佢，好難講！
