政情：邱騰華阻住建制派開飯
擴大將軍澳堆填區嘅廢法議案今日表決，立法會聽完施政報告之後，將罕有地繼續開工辯論廢法議案。早前政府當局拋出法律意見，指立法會無權否決議案，變相刮咗立法會一巴，唔少建制派及功能組別議員因而選擇支持廢法，令環境局局長邱騰華得不償失。喺群情洶湧之下，今日嘅辯論都唔知要傾到幾點，立法會注定開ＯＴ，最慘係本身約好咗今晚一齊食飯嘅建制派議員，為咗廢法議案要遲啲開飯，班議員實行要餓住開會，今次真係多得邱騰華唔少！
煲呔曾一早預告咗，今年嘅施政報告會比以前長，分分鐘講足兩個鐘，換言之，今日最快下晝一點先可以辯論廢法議案。雖然立法會主席為咗慳時間，已經決定將廢法同政府嘅延遲擴大堆填區議案一併辯論，不過每個議員每人仍然有十五分鐘發言時間，有好多議員都話，今次政府嘅法律意見簡直係踩到立法會上心口，絕對唔可以就此罷休，肯定會用盡十五分鐘鬧盡邱騰華，等佢明白自己有幾不知所謂。
團體「恐嚇」唔投票唔畀走
立法會秘書處初步估計，今日嘅立法會大會好可能要講到八點先完，但建制派飯局約咗七點開飯，莫非要焗住改期？個別建制派議員就話唔得，因為時間太趕，大家又忙，一改又唔知幾時先約得齊人，惟有大家齊齊捱肚餓，等每個議員鬧夠邱騰華、投埋票先去食飯。好彩仲有議員識得自得其樂，話如果早散會就可以食晚飯，遲咗要大家一齊食消夜都係新嘗試喎。
議員要捱肚餓之外，有壓力團體更揚言，為睇實班功能組別議員投票，決定派人守住立法會各個門口，唔畀佢哋喺投票前走，不過相信到時立法會保安同警察都會保護佢哋嘅！