中環出更：「寶珠姐」踏台板顯功架
保良局副主席梁寶珠（Jacqueline）與「影迷公主」陳寶珠有個相似的名字。無獨有偶，Jacqueline都鍾情舞台，十年前由初哥學起，走圓台拉筋壓腿，苦練一字馬，無一不是十年苦功。上周一，Jacqueline喺沙田大會堂踏台板，演出《再世紅梅記》、《梁祝恨史》及《白蛇》，吸引戲迷追住佢大叫「寶珠姐」。
Jacqueline係成功製衣商人，唱大戲，是業餘興趣，但為了一連三天嘅演出，佢籌備咗足足一年。Jacqueline小時候愛跟婆婆入戲棚睇大戲，但只係坐喺台下做戲迷，直至十年前遇上啟蒙老師廖森，愈唱愈有癮。學粵劇，最大得着是大膽了，不再怕怕醜醜，跟隨大老倌林錦棠登台，亦未嘗「蝦碌」。
囡囡孖男友捧場
演出當晚，愛女林玉茵（Maya）帶埋男友Alex捧場，Maya愛騎馬，母女興趣各異，但媽咪登台，佢一連睇足三晚無失場。Jacqueline對粵劇非常認真，不惜工本，喺表演中加入電影動畫效果等新元素，難怪戲飛收入都唔夠冚整體支出。
三場演出過後，恭賀電話響不停。但推廣粵劇之路仍然漫長，Jacqueline慨嘆香港表演場地不足，想踏台板表演，往往要排期至少一年。Jacqueline希望集結各方有心人，共同創建一間弘揚表演藝術嘅中學。
卓妮