中環出更：大肚陳晴撐慈善高球賽
富豪們鍾情嘅高爾夫球同推動兒童教育，聽落去好似風馬牛不相及，偏偏滙豐就將兩者拉埋一齊，下月喺上海大搞世界高爾夫錦標賽，為聯合國兒童基金會（UNICEF）籌款。向來為善最樂、剛剛獲委任為UNICEF香港委員會嘅陳晴（Judy），尋日腹大便便都抽空出席，仲話BB第一次嚟高球場，興奮得滯係咁踢佢喎！
王冬勝指鄭海泉身體唔錯
同時兼任海洋公園保育基金主席嘅Judy，向來好鍾意小朋友，亦做好多保育工作。尋日Judy就以一身熊貓打扮出場，身穿Vivienne Tam 出品嘅鬆身熊貓圖案上衣，加一條名師設計嘅熊貓鑽石鏈，一睇就令人聯想起佢早前領養嗰隻大熊貓「晴晴」。Judy自爆自己打高球唔叻，一年先打一次，但就好享受打波過程，事關可以同家人天南地北暢談一番喎。
好快做媽咪，Judy話依家每日都會同BB傾偈，BB亦好聽話，但就未計劃會唔會搵做過中央高官嘅爸爸幫佢改名。
講開又講，滙豐中國董事長鄭海泉（Vincent）早前大病初愈，強勢復出，尋日有份主持活動嘅滙豐亞太區行政總裁王冬勝話，佢都有約Vincent出嚟食飯見面，仲話Vincent身體唔錯，叫外界唔使擔心。
卓妮