中環出更：李剛謙稱不懂書畫
近年喺內地人氣急升嘅畫家徐文國喺香港舉辦書畫展，中聯辦副主任李剛尋日現身展覽揭幕禮，自爆同徐文國嘅一段淵源，仲謙稱自己「不會畫、不會寫，看的比較多」。其實大家都知李剛做過文化部對外文化聯絡局局長，對文化藝術嘅認識分分鐘深過好多特區政府官員。
徐文國嘅書畫作品展尋日起一連三日喺上環文娛中心展出，佢係清朝著名文學家及藝術家鄭板橋嘅同鄉，作品好有鄭板橋風格。李剛尋日喺揭幕禮上話，佢識咗徐文國差不多三年，記得初次睇到對方作品時，感到好震撼，事關今年只係五十歲嘅徐文國年紀唔大，但所畫嘅山水畫氣勢磅礡、人像畫又夠細緻。不過講到自己，李剛謙稱自己唔識畫畫同書法，只係睇得多咋，但就好有興趣幫徐文國喺香港搞展覽，只係對方以自己作品唔多為由一直未成事。今次終於成功邀請到佢來港開書畫展，仲係一開口就搞掂。
卓妮