政情：蔡堅娶新抱不忘收風
蔡堅重返醫學會出任新一屆會長，領導香港最大嘅醫生組織，上場第一炮，就係對準食物及衞生局局長周一嶽提出嘅自願醫療計劃發炮，尋日佢詳列十點意見，批評政府嘅醫保計劃行唔通。原來喺政府公布醫保計劃前一晚，佢同醫學會核心已經同周一嶽食飯收風，甚至連前晚（周日）蔡堅娶新抱，佢都把握機會向捧場飲喜酒嘅醫生老友搜集意見。
原來喺政府公布計劃方案前一晚，醫學會請周一嶽同其副局長梁卓偉食飯收風，蔡堅同醫學會一眾會董當晚已炮轟咗周一嶽足足三粒鐘，之後再開會開到三更半夜，對醫保方案制訂意見初稿，但因未問會員意見，先無將初步意見公開。
聞說蔡堅前日第二次做老爺，請咗幾十個醫生去佢細仔嘅婚宴。佢話啲老友嚟飲，恭喜佢，佢都無放過機會，「八卦」吓佢哋對醫保嘅意見，意見立場到尋日記者會前至完稿，大部分會董都支持，只有個別一、兩個會董反對，都算係有交代囉。