政情：張文借華叔讚馮偉華
教育界立法會議員張文光講明無意競選下屆立法會議席，希望交棒畀教協會長馮偉華，兩個人尋日除咗一齊跟傳媒聚會，席間張文仲借華叔把口讚馮偉華，加強游說馮偉華參選，不過馮會長就話立法會議員要兼顧多樣事項，仲要考慮吓喎。
教協搞傳媒聚會，新舊會長張文、馮偉華齊齊現身，除咗講小班教學，當然仲有兩年後嘅立法會議席接棒問題，張文屬意會長馮偉華，佢話曾經就馮偉華上任教協會長後的表現問華叔意見，華叔的回應次次都係一字記之曰：「好！」張文笑笑口話，華叔對佢嘅表現反而諸多意見，以往兩人同任立法會議員時，張文會上發言後，就不時收到華叔傳紙仔：「你讀錯字啦！」搞到佢好大壓力添。
雖然得到華叔肯定，不過馮偉華就話，本身做教協會長已經有好多事項要處理，如果做埋議員，將會失去好多家庭時間，所以仲係要諗諗先喎。
睇嚟張文就算借華叔嘅讚賞嚟捧馮偉華上位呢一招，馮偉華都未必就範，張文嘅退休大計唔知使唔使延後四年呢？