政情：田少捐紅酒撐旅發局
旅發局主辦嘅香港美酒佳餚巡禮喺本月底再度開鑼，今年加設「名人名酒薈」項目，由名人及機構送出三支六公升容量嘅法國靚紅酒，其中兩支更係法國嘅一級酒莊，包括旅發局主席田北俊捐出嘅1995年Mouton-Rothschild紅酒，市值四至五萬元。三支酒分三日開瓶，供每日首一百五十名持有尊尚品酒證嘅人士品嘗，三百元品酒證費用飲一杯已經翻本。
Mouton-Rothschild為法國五大酒莊之一，有出色嘅果香及豐富嘅口感。田少話，支酒喺九五年釀製，儲存至九七年入樽，呢種六公升紅酒產量唔係太多，所以價錢由二○○○年購入至今已經升值一倍有多，佢笑言紅酒升值能力快過買樓。田少又話，買紅酒同買樓好相似，都係預早買酒花，葡萄收成時就要扑錘同代理買貨，入樽後十八個月才運抵本港。
田少最近又奪得十大衣着獎，原來已經係佢第二次獲獎，佢謙稱以佢現時嘅年紀，今次攞獎特別高興。