政情：立會搞展覽議員玩快閃
為拉近市民同立法會距離，立法會尋日起喺港鐵香港站舉辦歷來第一次展覽。立法會主席、內務委員會正副主席，同唔同黨派議員合共八人，齊齊為展覽揭幕，不過揭幕儀式一完，唔少議員就快閃鬆人。
位處香港站收費區
呢次展覽介紹咗立法會嘅歷史、架構、添馬艦立法會新大樓、秘書處嘅工作等資料，仲有「議員的一天」欄目，介紹議員平時點樣度過忙碌嘅一天，現場又有電腦遊戲畀市民認識不同選區或者不同界別嘅議員。不過展覽位處香港站收費區，有興趣嘅市民就要畀咗錢先睇到。
八位為展覽剪綵嘅議員，只有主席同內會正副主席劉健儀、李華明喺剪綵後留低，向來自馬鞍山宣道會台山陳元喜小學嘅三十幾位同學作講解，其餘五位議員望吓個展覽就鬆人，莫非嫌展覽太悶？
今次展覽由周一至周五一連展出五日，期間會有議員到展覽場地同市民見面，至於議員咩時候現身，秘書處就提供唔到資料喇，所以大家有冇機會見到佢哋，怕且要講緣分啦！