政情：維持五選區利細黨突圍

政府訂框架予選管會

從法律層面講，立法會每個選區嘅議席多少，係由選舉管理委員會為選區具體劃界時一併釐定，不過，實際上決定權掌握喺港府手裏，事關程序落到選管會前，港府已先訂明一二年立法會直選有幾多個選區，以及每區議席上下限，有咗呢個大框架，選管會能自由發揮嘅空間實際已不多。

按當局早前向十八區區議會正副主席透露，港府已經敲定一二年立法會直選維持五區，目前政界關注嘅，係新增五個直選議席點分？呢個答案直接左右政黨嘅直選部署。據了解，港府傾向將其中四席均分予新西同新東，令現已有八席嘅新西進一步「膨脹」增至十席，新東亦由七席變九席，名副其實成為兩個「巨無霸」選區，勢成兵家必爭之地。

大家應該記得，親中陣營嘅民建聯曾倡議「六區方案」，建議將新西同新東拆細，再拼合加新增一個「新界北」選區，港府同西環最終都唔撐方案，決定維持五區，某程度折射出中央對整個親中陣營嘅管理理念。

現行選舉制度比例代表制有一套清晰遊戲規則，就係選區議席愈多，愈有利細黨同獨立候選人勝出，以新西、新東為例，加到十席同九席後，候選人只須攞約兩萬幾至三萬票便可當選，加上競逐者眾，兵荒馬亂，弱方易趁亂突圍。相反，如果新界拆成三區，每區均分成五至七席，直選實力較弱嘅自由黨同龐愛蘭等就好大鑊，分分鐘全軍覆沒。

直選係政黨生命線，中央容許以選舉制度「泵大」新東同新西兩區，有資深親中陣營人士形容，呢套係平衡遊戲，讓自由黨前主席田北俊（或方國珊）同二少田北辰喺呢兩區收復失地，東山再起，亦好讓龐愛蘭喺新東有機會跑出，百花齊放，而非將所有雞蛋放晒喺一隻籃內，令大黨嘅地區勢力愈嚟愈大。中央呢套平衡思維，將難免左右一二年建制派嘅直選布局。