中環耳目：鄭志明愛銀座梅林吉列豬扒
周大福集團主席鄭裕彤嘅孫仔孫女已逐漸接班，長子鄭家純嘅次子鄭志明（Brian）去年出任新創建執行董事之後，對公司嘅業務愈嚟愈熟手。
Brian對哥哥鄭志剛（Adrian）一手一腳打造嘅尖沙咀藝術概念商場K11好支持，經常去嗰度搵食買嘢，佢同卓妮推介已有八十二年歷史嘅日本著名吉列豬扒專門店銀座梅林（Ginza Bairin），必食之選梗係鎮店之寶吉列豬扒啦！
上周卓妮喺新創建嘅業績會見到Brian，佢今年先至廿七歲，但講起公司業務頭頭是道。Brian成日去K11蒲，盛讚銀座梅林嘅吉列豬扒好好味。卓妮記得佢哥哥Adrian都好鍾意呢間吉列豬扒名店，K11仲係佢哋進入香港嘅首站添！炮製靚吉列豬扒嘅秘訣係揀選一級材料，令豬扒香脆但唔油膩，再配埋秘製甜醬汁，咁就美味滿分啦！