中環出更：李妮全方位享受有機生活
追求有機生活已經成為一種時尚，前亞姐冠軍、博愛醫院總理李妮（Lily）都係有機生活嘅狂熱分子，佢唔單止代理澳洲有機護膚產品，又喺屋企自種有機蔬菜，連老公喺陽澄湖旁邊開嘅餐廳，都堅持提供有機飼養嘅大閘蟹，難怪佢睇落有活力又開心。
西貢買地種菜
早前一個下晝，卓妮去咗銅鑼灣時代廣場嘅City'Super買嘢，咁啱撞到Lily，見佢好專注咁喺一個護膚產品櫃位前同售貨員傾偈，又試用吓產品，原來佢巡緊舖。呢隻澳洲入口嘅有機護膚品，原本係佢朋友引入嘅，後來佢試用後覺得好好，於是就同朋友一齊做，啱晒依家貪靚女士追求有機護膚嘅潮流。
同Lily傾開有機生活，卓妮都有啲意外，原來佢有機得好緊要。Lily話，佢同媽媽都喺自己屋企種菜，有辣椒、苦瓜同埋葱等，食唔晒就送畀朋友一齊分甘同味。最近Lily老公陳生喺西貢買咗塊地，陳太正密謀預留空地種菜，到時菜園規模就更加壯觀啦！
咁仲未夠喎，佢老公陳生喺江蘇陽澄湖附近投資咗間餐廳，為確保啲大閘蟹健康，陳生要求供應商有機飼養，唔落激素，無論啲蟹肥定瘦都保證會收貨，果然咁樣湊大嘅蟹係唔同啲，外觀白淨啲，蟹膏清香啲。最多食兩隻嘅Lily，食自家蟹可以一次過食六隻添！
卓妮