中環出更：肥龍掃碟勁煲莎翁歌劇
前政務司司長「肥龍」許仕仁與太太羅美美出晒名係歌劇發燒友，經常飛去外地睇歌劇，即使身在香港都經常到金鐘太古廣場間「香港唱片」（Hong Kong Records）買歌劇光碟，買慣買熟，仲做埋VIP會員。
卓妮早前下晝兩點左右，又見到肥龍去買碟，佢挽住個紙袋行入「香港唱片」，然後直入專賣古典音樂嘅玻璃房內睇新碟，熟晒環境，連職員都認得佢，同佢打招呼。
自嘲無新聞價值
肥龍睇咗只係僅僅幾分鐘，就扑錘買咗隻William Shakespeare（莎士比亞）嘅《As You Like It》（皆大歡喜）藍光影碟，隨即喺銀包攞出五百元到收銀櫃位付款。呢套藍光碟原價二百一十八元，原本肥龍以VIP卡買碟可以有九折，連特價貨品都有九五折，但呢套碟依家已經做緊超特價八折，折實為一百七十四元，所以唔可以再用VIP卡。
卓妮上前同肥龍打招呼，佢話自己聽歌有八成係聽古典音樂，餘下兩成係其他音樂，又話會去日本東京同上海。講多兩講，肥龍就話：「我依家無乜特別，又無政治，又無八卦嘢，無乜好寫，你去搵其他人仲好啦！呢，好似馬時亨（中策集團主席）、葉澍堃（馬會大董）就多嘢寫嘞！」雖然肥龍猛話自己無乜新聞價值，但對卓妮嘅態度依然好親切。
《As You Like It》係英國著名劇作家莎士比亞於一五九九年創作嘅一齣喜劇，背景係一個森林，主要內容描寫男女主角因各自原因而逃離宮廷，喺森林中相遇並墮入愛河，情節甜蜜浪漫，絲絲入扣，而男主角經過重重困難之後繼承了爵位及遺產，最後有個皆大歡喜嘅結局。
卓妮