中環出更：胡曉明戴Dunhill呔掃走倦容
菱電發展主席胡曉明（Herman）公職一籮籮，但佢對城大嘅活動特別投入，早前卓妮見佢略帶倦容出席城大頒發榮譽院士典禮，Herman直言城大有活動，佢無論幾忙都要鼎力支持。好彩當日佢着咗套Brooks Brothers淺色西裝，又配搭咗條圖案精緻、色調柔和嘅灰白色Dunhill高爾夫球人仔靚呔，即時掃走幾分倦容。
最愛聘請城大生
Herman係加州大學舊生，對於來自美國嘅Brooks Brothers喜愛有加，佢話喜歡呢個牌子嘅衫夠啱身。至於條Dunhill領呔係英國老牌子，佢哋每季都會推出唔同圖案襯晒品牌形象，好似恒隆集團董事總經理陳南祿就有條泊滿飛機仔嘅Dunhill領呔，Herman嗰條就鋪滿揮桿英姿嘅人仔，散發着典型Dunhill本色。但佢笑言，依家已經好少打高球喇！
Herman坦言好喜歡城大，本港商界亦都最鍾意聘用城大學生，因為佢哋多數係平常百姓家第一代大學生，即係來自社會基層，待人處事較實在。Herman唔係賣花讚花香㗎！事關佢身兼另外兩間本地大學嘅校董會或顧問委員，但城大喺佢心目中嘅No.1。
卓妮