中環出更：政商齊賀張建東一桿入洞
行政會議成員張建東（Marvin）早前喺英國St. Andrew高爾夫球公開賽場地打出一桿入洞佳績，一眾老友老早已等住佢請食飯慶祝一番。尋晚Marvin張喺中環香港會設宴，唔少政商界老友帶備禮物開心赴宴。立法會議員梁君彥（Andrew）最有心思，買咗盒Taylor Made嘅高爾夫球做禮物，雖然價錢只係六百元左右，但係就勝在誠意搭夠。
尋日最早到場嘅係財經事務及庫務局局長陳家強，未到七點就現身，成為第一個蒲頭嘅嘉賓，卓妮都畀佢嚇咗一跳。問佢咁早嚟做咩呢？局長笑言，佢嚟做吓運動之後再赴宴會，卓妮先至醒起，局長放工後習慣去香港會做GYM，精神抖擻後再去參加酒會或者應酬，尋晚都唔例外。
晚宴七點半舉行，身兼職業訓練局主席嘅Andrew喺晚宴開始前施施然來到，卓妮又係呆一呆，事關由旅發局主辦嘅「美食之最大賞」頒獎典禮，一向喺職訓局旗下嘅中華廚藝學院舉行，但今年改為喺會議展覽中心舉行，連Andrew都唔去捧場，發生咩事呢？卓妮問Andrew點解唔去出席頒獎禮，點知佢好晦氣咁話：「又唔係我頒獎，又冇請我去，點去啊！」咦？唔通別有內情？
梁君彥送禮顯心思
卓妮見Andrew捧住份禮物，原來係Taylor Made牌子Penta型號嘅高爾夫球。Andrew話未試過一桿入洞，好恨將來有機會揮出漂亮一桿，咁就可以請食飯威番次啦！
尋晚到賀嘅政商猛人仲有保安局局長李少光、滙豐亞太區行政總裁王冬勝、經濟動力立法會議員林健鋒、全國政協委員李大壯、公開大學校長梁智仁、教統會主席鄭慕智等人。
主人家Marvin張七點零五分到場，佢笑稱擺咗幾圍枱慶祝，最緊要大家開開心心聚吓腳啫！
卓妮