中環耳目：曹宏威華商會所打躉
眨吓眼，生物化學博士曹宏威退休已經九年，但佢依然好活躍，最近大談UFO，令人冇忘記佢。早前卓妮見佢喺已有百幾年歷史嘅中環華商會所歎下午茶，面前放着一杯香濃即磨咖啡同埋鎮店嘅蝦多士，好識得歎世界。
點喼汁食蝦多士
原來當日曹博士已經喺會所見咗三批朋友，佢笑言，會所已經變成佢嘅私人會客室。退休前佢未雨綢繆，加入華商會所做會員，以便有個落腳之地。依家佢經常喺度打躉，無論係十四樓嘅中菜廳，十樓嘅西餐廳，甚至乎十一樓嘅圖書館，都係佢嘅熱門蒲點。
華商會所嘅蝦多士受到好多名人追捧，好似華商會所主席黃守正及全國人大常委范徐麗泰，都對佢讚不絕口。曹博士就鍾意點喼汁食，貪佢夠醒胃。
位於中環干諾道中嘅華商會所，已成立一百一十三年，係本港首個專為華人而設嘅會所。連孫中山先生都曾於一九一三年參加過佢哋嘅酒會，仲留低咗親筆簽名，依家會所接待大堂都有一幅孫中山嘅相片添！