廠商會嘅「十八區專業諮詢服務計劃」尋日正式開鑼，副會長兼計劃搞手吳永嘉（Jimmy）宣布，頭炮將會喺十一月於中西區搞健康講座，之後仲會有一對一嘅各類型專業諮詢。Jimmy雖然唔肯認計劃同區議會選舉有關，但就自爆邀請咗匯賢智庫史泰祖加盟廠商會做贊助會員，不過史醫生就未回覆喎。
我哋即刻搵史醫生求證，佢話現階段未諗過入會，因為自己太多嘢做，冇時間開會就加入都冇意思。不過史醫生睇嚟對廠商會都唔抗拒，但使唔使事先同匯智主席葉劉淑儀「申報」呢？點知史醫生好大反應，話自己唔係三歲細路哥，唔需要做乜都問人喎！
其實如果史醫生入咗廠商會，進身政壇必定又多個好路數。事關立法會廠商會代表林大輝打晒開口牌，話鼓勵廠商會派多啲人選區議會、立法會，甚至係選委會選舉，因為只要廠商會多啲票，就自然可以選個合心水嘅特首喎！咁大輝心水係邊個？佢就鬼鬼馬馬話，佢手中嘅係鐵票，冇人可以動搖喎。