政情：議員不到美加心不死
立法會議員海濱規劃事宜小組早於去年已計劃去美加「考察」，因為種種原因，始終未能成行，但佢哋點都唔肯放棄，誓要喺後年立法會任期完結前，「成功爭取」去到美加為止。有議員仲諗住公帑遊埠，連汁都要撈清光。
海濱小組嘅美加團認真一波三折。佢哋本來決定上年九月尾出發，點知撞正建國六十周年，之後再改為今年年頭，但又適逢美加落雪，海港結晒冰冇嘢睇。原本佢哋諗住前日出發實冇走雞，但居然又有成員臨時放飛機，一行五人得番三丁友，最後又係要「拋錨」告終。
雖然海濱小組嘅美加之旅已經「拋錨」三次，但佢哋依然鍥而不捨，誓要去到為止。佢哋上星期開會時，初步定咗下年復活節假期再去，不過數口向來都精嘅公文袋陳淑莊（Tanya），竟然喺會上提議二○一二年先去喎。Tanya言下之意，無非係想喺二○一二年埋單計數前，諗計用盡埋其他議員用剩嘅津貼；講得興起，佢仲話如果嫌美加團遠嘅話，去番轉新加坡都好。社民連陳偉業亦都加把嘴，提議喺美加團成行前去住青島先喎。