政情：劉兆玄訪港唔見高官
台灣前行政院長劉兆玄由尋日起展開三天訪港行程。經已八年無嚟過香港嘅劉兆玄話，今次訪港唔會見特區政府嘅官員，但佢今日會同行政會議召集人梁振英一齊出席「中華文化在台灣」論壇。劉兆玄舊年辭去行政院長後，今年初起擔任台灣國家文化總會會長，佢笑笑口話非常鍾意依家嘅工作。
劉兆玄係台灣嘅馬英九總統於○八年當選後嘅第一任行政院長，不過舊年台灣八八水災導致人命傷亡，台灣政府被批救援不力，劉兆玄就喺舊年九月問責下台，為事件負責。被問到依家嘅工作係咪令佢更開心時，劉兆玄話做行政院長時，每日都公務纏身，不過佢追求嘅並非做自己喜歡嘅事，而係喜歡自己做緊嘅事，所以每份工佢都鍾意，答得真係圓滑。
今次劉兆玄只係留港三日，佢會抽時間見文化界朋友，但唔會同特區官員碰頭。而佢今日出席嘅論壇有梁振英份，對於若果梁振英做咗特首會否有利港台交流，劉兆玄好謹慎咁話，未發生嘅事暫時唔回答啦！