政情：郭位秘製酸辣湯十萬成交
城市大學前晚搞咗個校友論壇，題為「從美饌細嘗五味人生」，城大校長郭位親自下廚炮製一味酸辣湯，比喻人生不同經歷。郭位自爆個人最大興趣係入廚，細細個喺台灣經常跟阿媽到街市買餸，佢拿手菜式有好多，酸辣湯係其一。郭位話，自己煮餸絕對唔加味精，亦好少落糖，只用真正材料就夠。佢笑笑口舉例話，一個靚女，即使唔化妝都係靚女喎。
肥亨因太太嗒糖
雖然酸辣湯係郭校長拿手菜，但事前佢都有少少擔心，事關前晚大會只提供番薯粉做芡粉，佢未用過唔知點掌握，但最後都順利完成，有校友就以十萬元投得，仲即場與校友及嘉賓分享。前晚城大請到中策集團主席馬時亨做嘉賓，佢大讚郭校長煮一煲酸辣湯就籌到十萬元，建議郭校長喺城大開番檔熟食，相信可以好快為學校籌到一億元。
肥亨仲借酸辣湯大談人生道理，話人生中要嘗盡甜、酸、苦、辣，才算得上係完整嘅人生。究竟肥亨人生最甜係邊個時刻呢？原來就係當年喺外國認識佢太太王培琪（Linda）嘅時候，佢話即使一個人生活點艱苦都好，再也不感到孤單。