政情：接班人要熱身 白韞六再坐一會

入境處高層呢兩年屢有異動，去年先有副處長趙偉佳因處理商務及經濟發展局副局長蘇錦樑卡片事件備受批評，放完長假後職位跌一級。今年又發生海關關長湯顯明女友、助理處長陳詠梅突然遞大信封，要求提早四年退休，消息震動入境處，亦進一步打亂處內高層嘅接班部署。入境處經歷連番高層人事震盪，白韞六喺「一哥」位置坐多三個月，可能就係配合呢個新形勢嘅必要安排。

憾未能參與50周年慶典

趙偉佳因卡片事件仕途受阻，陳國基冷手執個熱煎堆，由助理處長升任副處長，成為「一哥」儲君，並於今年中已通過副處長職位嘅「署任」期考驗，表現令人滿意，為入境處成功避過由政府派政務官（AO）空降入主嘅噩耗。不過，陳始終係中途紮職，對新崗位以至未來「一哥」工作，有愈多時間熟習愈好，所以白韞六遲走三個月，就係畀陳國基有更多時間為接棒「入境一哥」做準備，確保順利交接，唔會出現裙拉褲甩亂局。

白韞六一九五五年十二月出生，今年底就到公務員五十五歲退休年齡，夠鐘起身卸任，依家坐多三個月，即係明年三月離任。可惜呢個安排未能為佢圓夢，事關入境處明年五十周年大慶，八月有大型慶典，同佢離任之日只差五個月，白韞六未能參與呢場入境處盛事，為其卸任寫下完美句號，都算係一個小遺憾。

即將執掌入境處嘅陳國基，年輕時喺樹仁學院畢業，八二年加入入境處，由部門嘅公關新聞組，一直攀升至副處長，被譽為「樹仁之光」。陳國基若更上一層樓，助理處長鍾林慧好大機會接班，成為紀律部隊中首位「紅褲子」出身嘅女副首長，而佢騰出助理處長空缺，加上陳國基去年升副處長後騰空嘅助理處長位置仍未填補，即入境處一時間出現兩個「肥缺」，估計處內好快將有新一批第三梯隊冒起，到時大家又可點指兵兵，估吓邊個係入境處未來新星。