政情：曹宏威唔信UFO「訪」港
上星期嗰個雷電交加嘅晚上，好多市民聲稱見到不明飛行物體（UFO），仲影低咗好多「證據」，咁究竟係咪外星人趁行雷閃電嚟香港打探虛實呢？生物化學專家曹宏威早前出席一個酒會，梗要問問佢點睇，佢以一貫唔信邪嘅姿態話：「多餘！」由始至終堅守科學家講究實證嘅底線。
曹博士話，上世紀九三年有美國機構搵佢以專家身份，同廿幾名科學家一齊去英國睇UFO，結果得啖笑；佢又試過喺古堡守夜睇鬼，結果如何呢？佢話：「梗係冇啦！」仲牙擦擦咁反駁：「唔係我唔信，係冇得畀我信！」
李家仁：使乜咁執着
轉頭我哋又見到極地探險家李樂詩，佢對有冇UFO呢樣嘢持保留態度，話自己未親眼見過，但知好多人信。佢試過喺極地見過變幻莫測嘅極光，有啲係螺旋形，唔通又話係UFO咩？
兒科專家醫生李家仁就話，以前信基督教時就話上帝創造世界，但係冇人知上帝創造咗幾多個世界喎，有多幾個世界都唔出奇㗎！依家佢改信佛教，就會話：「有又好，冇又好，使乜咁執着？」