金融風暴衝突、樓市泡沫爆破，唔經唔覺已經係十二、三年前嘅事，依家好多名牌屋苑嘅樓價，亦已重返甚至升破九七、九八年嘅高位，但一提起「八萬五」呢個數目字，唔少香港人仍然心有餘悸，甚至一殼眼淚，廠商會立法會代表林大輝就係其中一個。不過佢唔係因為自己投資損手而產生陰影，而係當年有啲朋友「江湖救急」問佢借落啲錢，到依家仲未還清！
本港樓價最近升到失控水平，唔少政黨、市民、以至地產商，都先後表態要求復建居屋，特區政府迫於民意壓力，亦正積極考慮重推資助房屋，不過死都唔肯用番「居屋」呢個名，以免令人諗番起「八萬五」呢個噩夢。
林大輝尋日同傳媒聚會時，不點名批評某啲「有權有勢嘅人」唔應該亂咁講嘢，尤其係針對民生同房屋政策，擔心「講兩講（樓價）就會跌」。佢又話香港人最驚兩樣嘢，一樣係天災，一樣係人禍，其中天災就係沙士，人禍就係「八萬五」。佢仲自爆當年樓價急跌，有幾個朋友畀銀行追數問佢借錢，有啲到依家仲未還晒，因此佢亦係「八萬五」嘅間接受害者。
大輝愈講愈誇張，自稱依家去到外地旅行，酒店房間嘅夾萬密碼都係用「8500」，以警惕自己「八萬五」嘅禍害喎。對於近日畀人炒到熱烘烘嘅仇富仇商問題，佢認為市民只係不滿部分地產商嘅處事手法，唔係真係憎晒整個商界同所有有錢人，叫大家唔好盡信「某君」，明顯又係語有所指。
講番由佢牽頭創辦嘅地區政團「社區十八」（C18），大輝話C18現時有三十七名成員，其中三十三人為現任區議員，兩人曾參選但落敗，佢哋絕大部分都有意角逐明年區議會選舉，但未必會打正旗號用C18個名。至於身為沙田委任區議員嘅佢，亦表明有意轉戰區議會直選，唔怕港府計劃取消區會委任制，選區方面，沙田同九龍都會考慮。至於轉戰立法會直選，佢就話應該唔會喇，除非佢依家所屬嘅廠商會功能界別離棄佢喎。