中環出更：施子清三代同堂撐福建美術展
全國政協委員、香港福建書畫研究會會長施子清嘅書法造詣高乃廣為人知，近年佢幾位公子逐漸接棒，老人家有多啲時間投入文藝世界。尋日由佢傾力促成嘅福建省當代美術（晉京）大展喺中央圖書館開幕，卓妮見施子清一早到場打點，其他福建幫頭領林樹哲、盧文端都齊齊現身，全國人大常委范徐麗泰、慈善家陳瑞球都畀面到場，氣氛好熱鬧。
林樹哲自嘲廠佬
施子清二子施榮懷、四子百仁基金主席施榮忻（Jaime）都嚟撐爸爸，現場有位活潑好動嘅小妹妹，好似喺自己屋企咁自由出入，原來係Jaime七歲囡囡Victoria。Jaime叫佢一齊影相都冇扭擰，但叫佢錫爸爸一啖就冇情講啦！祖孫三代樂也融融，難怪施子清愈忙愈開心。
施子清話，今次展出逾八十幅畫作，係規模最大嘅一次大製作。呢批展品啱啱喺北京嘅中國美術館展覽，係精心篩選嘅佳作。林樹哲好驕傲咁話，家鄉人才輩出，歷代都有好多文化藝術造詣極深嘅才子。咁佢係咪都寫得或畫得？佢謙稱，自己係廠佬，唔識呢的嘢喎。