中環出更：陳永棋全面退出亞視
昌興國際主席黃炳均向現有三名亞視股東購入五成二股權，成為亞視大股東。卓妮尋日去咗中華出入口商會個酒會，撞到有份出售股權嘅亞視董事、全國政協常委陳永棋，棋哥好輕鬆咁話，過幾日收到錢後，就會將手頭股份全部畀晒黃炳均，成單商業合約大家傾掂咗，佢正式無晒股份，仲會辭退董事職位添，即係全面退出亞視咁囉。不過，佢希望新舊股東能夠和氣生財。
望新舊股東和氣生財
棋哥同卓妮講，其實佢三年前已將手頭亞視股權賣咗畀全國政協委員查懋聲及荷蘭銀行，當時已無理亞視業務，但仍然掛住「董事」個名，所以過幾日收埋錢，就會全面退出。至於啲股份售價好唔好，佢唔肯透露，話最重要係做好件事。佢又希望將來新舊股東可以和和氣氣，和氣自然生財，大家攞多啲錢出嚟搞好個亞視，等以前做過亞視大家庭嘅一分子，都會覺得高興。