中環出更：丁毓珠偕闊太遊德硬
香腸
8×1=8，雖然呢條數連小學生都識計，但如果言語不通，答案隨時變成六十四。卓妮尋日去工商婦女界十‧一酒會，發現好多名媛闊太都喺暑假外遊，其中維多利亞教育機構校監丁毓珠就同老友林貝聿嘉搞咗個東歐團，坐遊船暢遊多瑙河，分別到德國、捷克、奧地利、匈牙利等國家，遊覽德國期間，佢哋同行八個女人仲要硬六十四條德國腸，笑到卓妮標眼水。
珠姐同林太嘅東歐團有二十人，珠姐話，一行人暢遊德國時，去到一間餐廳柯打一碟德國香腸，諗住八人一人一條，點知侍應講德文，於是喺言語不通下誤會咗佢哋意思，最後捧咗八碟共六十四條香腸出嚟。珠姐笑謂：「一世人都未試過一次過食咁多香腸！」
除咗畀德國腸嚇親，珠姐話以前經常聽人講「藍色多瑙河」，一直好想去見識吓，點知去到卻發現河水唔係藍色，而係綠色，有朋友話要到上游至睇到藍色河水喎！講完一輪趣事，珠姐話今次旅程收穫豐富，除咗親身到維也納王宮聽音樂會，仲買咗好多當地著名水晶，包括老虎和小丑造型擺設。
蔡菜子難忘大自然如廁
尋日同場仲見到前立法會議員蔡素玉，佢都喺八月中同一班舊同學去西藏自駕遊兩星期，到過拉薩、可可西里及唐古拉山等地，仲首次登上海拔五千多公呎嘅珠峰。蔡菜子話，旅程中最深刻係大家要喺大自然如廁。佢話：「尷尬都無辦法，盡量揀多啲樹嘅地方遮住囉！」同行包括前港大副校長程介明。
中總會長蔡冠深太太蔡關穎琴（Janice）六月中同愛女歐遊，分別到意大利米蘭及佛羅倫斯、法國巴黎等地購物。歐元兌港元匯率早前跌到九個半以下，Janice話啟程前到前中大校長劉遵義屋企食飯，劉教授話歐元唔會再點跌，但有學者又叫佢咪掂歐元，結果心大心細，最後只換咗一半旅費，另一半就以信用卡簽帳，結果信用卡消費嘅兌換率高達九元九角，只低過尋日匯價少少，難怪佢呻笨！
卓妮