政情：盧瑞安料內地無人願遊菲
香港旅客喺菲律賓慘變人質遭槍殺慘劇，為港人帶來不可磨滅嘅悲痛回憶，中港兩地市民集體杯葛去菲國，即使嚟緊嘅十‧一都未必成團。作為旅遊業界老行尊嘅香港中國旅行社董事長盧瑞安坦言，雖然內地只發指引向市民作出勸喻，但內地人同港人一樣咁關注今次慘劇，估計無乜內地人再去菲國旅遊，菲國旅行團數目近乎零。
身兼全國人大代表嘅盧瑞安，尋日出席一個十‧一酒會時話，佢旗下中旅社同好多香港旅行社一樣，都喺慘劇後再無辦菲國團。至於事件令生意損失有幾多，佢就話目前無數字，難以估計。究竟停辦到幾時，盧瑞安就話要睇市場需求喎！
不過，並唔係個個人都絕迹菲國，好似行政會議成員夏佳理（Ron）就因為有個大仔住喺菲國宿霧，所以會繼續定期飛過去探望囝囝。問阿Ron會否因為慘劇建議囝囝移民，佢就話囝囝四十幾歲人，自己識得諗㗎啦，唔使佢操心喎！