政情：蘇利民盼護士制服潮啲
最快下月中離任嘅醫管局行政總裁蘇利民，喺最新出版嘅醫管局官方刊物《協力》中，臨別依依道出對醫管局嘅十七個期望。蘇利民喺文中話，自從宣布要與家人團聚後，很多人支持他，令他更捨不得香港，香港人一向以事業為重，但不少人都贊同他將家庭放喺首位，令他很驚訝。
蘇利民喺訪問中，仲數咗對醫管局嘅十幾個期望，好似期望醫管局繼續壯大、增聘更多護士、護士工作量合理；最令人摸不着頭腦嘅係，佢期望護士們穿上更具時代感嘅服裝，莫非佢覺得現時護士嘅制服太老土？
醫管局近年就工時問題與醫生對簿公堂，令蘇利民有感而發。佢期望見到醫生及管理層可以凝聚一起，而唔係喺法庭上爭辯。佢又讚揚醫護面對三聚氰胺及人類豬流感危機等，發揮專業精神。外界盛傳蘇利民與醫管局主席胡定旭不和而劈炮，肥胡喺文中就強調兩人係好朋友，但一個人嘅去留，唔會影響醫管局大方向。