政情：黃嘉純羨慕喇沙有草場
九龍塘傳統名校喇沙書院尋日為新校長舉行就職典禮，乃該校首位新西蘭籍校長，身為校董嘅前律師會會長黃嘉純都去撐場。喺喇沙讀咗十三年嘅黃嘉純，大讚喇沙設施進步，羨慕依家喇沙仔可享用人造草足球場。
一九三二年創校嘅喇沙書院，因前校長王仁傑退休，新校長賀敬修士（Brother Steve Hogan）遠道從新西蘭喇沙書院調任香港，成為第十一任校長，典禮期間仲依傳統上台獻唱。
身兼港台顧問委員會主席嘅黃嘉純，原來係七七年畢業校友，由小一讀至中七，做咗十三年喇沙仔。佢話以前喇沙校風相當自由，就好似屋企一樣，放學後佢經常留校踢波或者打網球，但設施同依家差得遠啦。佢記得以前嘅操場係「大沙漠」，一起腳就飛沙走石，塵土飛揚，拍馬都比唔上依家嘅人造草足球場咁靚喎。
唔講唔知，原來佢當年仲係網球校隊成員，咁有無攞過獎呢？佢答咗等於無答：「唔記得啦，你問我實話有㗎啦！」佢仲話依家羽毛球總會主席湯徫掄仲係佢同屆同學添。