政情：葉劉照完腸鏡玩多幾年

葉劉家族中有腸癌病史，自然令佢好上心。佢話現代人應酬多、食肉多兼少運動，為咗預防，佢平時會去健身室做運動，無論係帶氧、負重同舒展運動都做。今次為照腸鏡，兩日前已經戒口，尋日朝早入院正式檢查前，灌咗兩公升瀉藥排清體內嘅嘢，照完出嚟醫生話完全無問題，一粒息肉都無，五年後先至再檢查。

檢查結果咁好，葉劉喺facebook上好輕鬆咁話：「同你玩多幾年都得！」既然係咁，明年區議會選舉，葉劉係咪直搗一度係自由黨地頭嘅山頂選區呢？佢話仲未正式同自由黨傾，但自由黨唔願意放手係佢意料中事。盛傳葉劉可能轉戰薄扶林選區，為輸咗補選嘅徒弟劉應東報一箭之仇，今次佢無否定，話考慮緊未有定案喎。