政情：D姐帶隊北上遊學 常秘總動員習國情
回歸十三年，中央研判香港人心尚未回歸，一直放心不下。特區管治班子受君俸祿，本應分君之憂，但香港公務員出名不諳國情，故步自封，第一個要調校其實就係佢哋。繼日前十六位副局長同政治助理獲中央邀請考察上海四日後，新聞處尋日又突然出稿，公布十五名常任秘書長破天荒以訪問團形式上北京同上海訪問兼研修課程，聽日出發，為期一周，今次鴨仔團由「Ｄ姐」公務員事務局局長俞宗怡帶隊。睇嚟政改之後，中央開始向公務員系統下工夫嘞。
九七之後，港府一向有為各級公務員安排北上讀國情班，不過，位至常秘級、而且打正旗號組團浩蕩北上，印象中應該係第一次，情況罕見。壯舉在前，一向各自為政著稱嘅十二個政策局，今次罕有咁齊心，總共有十五名常秘隨團，陣容空前，只有三個無法成行，就係運輸及房屋局常秘（運輸）何宣威、勞工及福利局常秘鄧國威同公務員事務局常秘黃灝玄。黃灝玄留港可能因為佢直屬老闆Ｄ姐要帶隊，公務員事務局又無副局長，所以要佢留守大本營。
特區常秘職級基本等同○二年實施問責制前嘅政策局長，全屬資深公務員，係現時公務員職級中嘅最頂層，今次十五名常秘北上研修國情，都算係「超級遊學團」囉。新聞稿指，訪問團會先到北京，喺國家行政學院研習，然後再到上海，與市政府官員同上海世博會事務協調局會面，並趁此機會到上海世博參觀。新聞稿又指此行目的係讓團員加深了解國家嘅最新情況，以及促進團員與內地官員之間嘅聯繫。最末兩句，表面睇似陳腔之調，內容空洞，其實蘊藏深意。
公務員未能配合管治班子
回歸十三年，香港政局亂象紛呈，施政紊亂，中央研判公務員系統未能好好配合特區管治班子，就係其中一個原因。當年董建華碰到土頭灰腦，其後換咗「公務員治港」，問題未見有根本性改善，所以政改過後，中央新治港方略棋局中，一定有處理公務員問題嘅一着，基本步就係製造機會，逐步讓公務員「加深了解國家嘅最新情況，以及促進與內地官員之間嘅聯繫」囉。繼副局政助同常秘後，下一批「超級遊學團」會唔會輪到所有部門嘅署長級官員呢？