中環出更：廣東幫合辦酒會冠蓋雲集
近排政商界名人又開始忙碌啦！事關十‧一酒會陸續有來。尋晚廣東三大社團就首次攜手喺會展合辦十‧一酒會，現場嘉賓冠蓋雲集。廣東幫空群而出，香港廣東社團總會首席榮譽會長陳瑞球、曾憲梓以及現任主席王國強皆現身。除咗自家人全力撐場之外，福建幫頭領洪祖杭、林樹哲亦畀面捧場。一眾台上嘉賓喺儀式結束前合唱《歌唱祖國》，場面好不熱鬧。
非為慳錢 免賓客頻撲
今次係廣東社團總會、香港廣東各級政協委員聯誼會同埋香港廣東外商公會，首次破天荒合辦十‧一酒會。廣東社團總會主席王國強（KK）話畀卓妮聽，三大社團一齊合辦唔係為咗慳錢，因為慳極都係幾十萬元啫！原因只係因為三大社團主要負責人大部分戴三頂帽，若然搞三場，要啲嘉賓跑三場酒會，麻煩啲嘉賓就唔係幾好喇，於是今年索性攜手合辦囉！
不過都有好多大忙人嚟一陣就走，好似中華總商會會長蔡冠深、名譽會長霍震寰，酒會未開始就離開咗，唔知係咪要趕去下一場？
香港福建社團聯會主席林樹哲都同卓妮講，佢哋社團嘅十‧一酒會將喺廿七日舉行，地點就喺炮台山屈臣道維多利中心嘅新會所，當日同時係新會所裝修後落成入伙嘅大日子。呢個會所係林樹哲上任後積極推動嘅自置物業，難怪佢咁上心，仲叫卓妮到時要去捧吓場添！
卓妮轉頭見到廣東社團總會副主席、協成行集團董事總經理方文雄（David）同全國人大代表羅范椒芬喺度密密斟，原來David有喜事。事關佢召集咗○三年開始有份上京參加國情班嘅三百名同學仔，成立咗新組織「香江聚賢」，佢親自揸旗做主席，預定下周三舉行成立儀式，同時舉行十‧一酒會。咁大件事，羅太話佢實會支持。咁多十‧一酒會排住隊嚟，睇嚟本港政商界名人呢排淨係舉酒杯，都肯定舉到手軟！
卓妮