爆管頻仍居民炎夏制水
酷熱天氣下，洗澡都會變成賞心樂事。不過，居於元朗蝶翠峰的歐小姐近日卻大受「制水」之苦。歐表示單在八月份下旬，大棠路便曾兩度爆食水管，每次蝶翠峰的供水均會即時中斷，「夏天先冇水沖涼真係好辛苦，水務署係咪要快啲換晒舊水喉呢！」
水務署發言人證實，位於大棠路的一條水管受老化影響，分別於八月十五及廿七日有不同位置爆裂。該署會盡快在該段水管加裝分閘掣，藉此在更換及復修工程完成前，減少因大棠路的食水管爆裂而對蝶翠峰居民造成影響。
「水務署言下之意，即係水管仲有排爆啦！」當區區議員梁福元直指該段水管由去年開始已經常爆裂，十八鄉北一帶亦將會有兩個大型樓盤入伙，擔心受影響人數會增加。梁批評水務署後知後覺，「十八鄉北要發展，同埋水管老化，都唔係今日嘅事，但水務署換喉就慢幾拍！」