政情：大舊直航莫斯科「朝聖」
俄羅斯係一個神秘嘅國度，唔少港人都想去探秘，但一諗起轉機要左轉右轉就即刻打退堂鼓。國泰早前正式宣布有直航機到莫斯科，仲請多位立法會議員搭「通航機」到當地慶祝。帶同愛妻把臂同遊嘅社民連陳偉業（大舊），就話俄國充滿歷史嘅浪漫氣息，一返香港仲即刻post相到facebook同大家分享添！
大舊今次係跟立法會經濟事務委員會到莫斯科，由於大會行程只得三日，撇除來回共十八個鐘嘅機程，計計埋埋其實只係得一日半時間留喺當地。一直炮轟港府漠視民生嘅大舊，出埠都不忘留意當地嘅民情。佢話喺莫斯科主動同啲年輕人傾過計，發現一個讀飽書嘅老師每月薪金竟然只得四千蚊，但當地物價卻奇高，慨嘆俄國貧富懸殊嘅問題比香港有過之而無不及。
大舊又話自己作為一個「社會民主主義者」，覺得俄國大革命呢段歷史好浪漫，所以去莫斯科嘅紅場參觀時，唔多唔少都有啲「朝聖」嘅感覺。不過佢就大呻三日旅程唔夠喉，希望有機會再嚟莫斯科。