鴨仔團喺星期一出發當日已經冇乜聲氣，跟住呢兩日仲無影無蹤，好似全體消失咁，卒之喺前晚深夜新聞處先發咗逾十張相，以圖片說明簡介佢哋去過邊。由於呢批相發得太遲，尋日報章冇報道，反而有個別電子傳媒先搵番譚志源跟進。點解政府咁遲先發相呢？究竟當中係邊個部門或者邊個環節出錯？呢個暫且不提，但相信連譚志源在內嘅鴨仔團都覺得呢次訪滬係一個大好嘅宣傳機會，依家變咗隔夜新聞，全部變晒明日黃花啦！
其實政府發放消息同圖片嘅時間，不嬲都有問題，前晚副局政助訪上海嘅相，近十一點至發放到報館，有一次發放去俄羅斯嘅外遊警示，更加係搞到凌晨一點四十一分，銷量高嘅報紙早就截晒稿，呢啲消息究竟係咪想畀人知㗎？