政情：立會考察團食盡東瀛
立法會衞生事務委員會大前日出發去日本考察，睇吓呢個長壽國家嘅醫療融資制度。呢次外訪團總共有九位議員參加，不過有五位都唔係事務委員會議員，唔知係咪日本特別引人入勝，所以咁多人踴躍參加呢？
議員考察之餘，仲大飽口福。有份去嘅民建聯陳鑑林（橄欖）話，食刺身同海鮮就不在話下啦，佢仲一嘗差不多成百蚊港元一片嘅日本國產和牛。遲啲有時間會買番啲金黃色嘅水蜜桃，或者再去北海道睇吓有咩魚類做手信，不過相信價錢唔講得笑。
食盡東瀛美食外，佢哋都有做正經事嘅！橄欖話參觀過日本嘅醫院同老人院之後發現，日本人嘅醫療保障雖然比香港好，但都存在問題，事關日本長者多，年輕人就要面對增加保費嘅問題，所以都值得香港借鏡。佢前日喺東京醫院參觀時，仲見到一張可以多角度摺合嘅病床，照顧唔同病人嘅需要，返港之後會同政府傾吓有無需要引入。