政情：胡文新捐800萬撐國家女冰隊
熱愛冰球運動嘅富豪後代、合和實業董事總經理胡文新（Thomas），尋日又豪捐八百萬元畀國家女子冰球隊，等佢哋有充足水源備戰二○一四年嘅冬季奧運會。連埋過去兩年嘅捐贈，Thomas累計已贊助中國女冰一千二百萬元，認真有心！
田啟文謙稱球技業餘
尋日Thomas以香港冰球訓練學校創辦人兼主席身份，出席雙方嘅簽約儀式，中國冰球協會秘書長于天德及多位球員齊齊拉隊出席，就連Thomas嘅好友、田北俊仔仔田文等富豪二代都現身撐場。田文逗留咗一陣就趕住返公司做嘢，佢話自己喺美國讀中學時打過幾年冰球，但技術就好業餘，唔及Thomas打得咁認真。前幾年Thomas發起香港冰球訓練學校，佢一於做埋董事會成員撐兄弟。
Thomas打冰球一向唔係玩玩吓，經常落場參加比賽展身手，下周五喺香港舉行嘅國際業餘冰球邀請賽，佢都會披甲上陣；Thomas仲講笑話，最近工作太忙，冇咩時間操練，惟有到時靠隊員嘅默契啦。
講起同中國女冰嘅淵源，Thomas話有次喺網上見到一篇講述佢哋刻苦訓練嘅報道，令佢好感動，湧起掏腰包贊助嘅念頭。Thomas希望今次贊助資金可以幫佢哋聘請國際級教練、發放訓練津貼同重要比賽獎金，希望佢哋喺嚟緊嘅冬季奧運會為國爭光！