政情：民主黨大佬輩區選大包圍
早前有消息話社民連將瘋狂派出過百人參加明年區議會選舉，其中七十人仲講明係做死士，參選不計輸贏。外界初時仲以為社民連咁做純粹係想攪局博出位，但原來民主黨評估過最新形勢後，亦決定採取同一策略，除咗以倍數增加參選人數，仲會游說啲本來已無意出選區會嘅立法會議員及黨內大佬出戰，專挑建制派星級區議員做對手，希望谷起整個區選選情同投票率。
民主黨喺明年區選嘅預算參選人數，升得仲急過香港嘅豪宅樓價，由最初建議同上屆差不多嘅數十人，不斷增加至一百人、百二人，最新估計仲會增至百五至百六人，前後升幅高達一倍。除咗因為該黨喺政改一役後民望上升外，背後仲有三大考慮因素。
為超級區會鋪路
第一係民主黨檢討過○三至○八年四次區會同立會選舉結果後，發現佢哋有派過人參選嘅區會選區，即使最後輸咗，該黨喺該區嘅立會選舉得票亦有上升。第二係根據泛民嘅區選協調機制，某黨候選人只要喺某區取得三成票，來屆就會擁有喺該區參選嘅優先權，因此即使明知今屆輸梗，都應該派人參選霸定下屆個位。第三係一二年立法會將新增五席「超級區議會」，參選人必須係現任民選區議員，該黨派定多啲人參選，將來揀人出戰「超級區會」就會靈活同機動得多。
為咗攞到盡，民主黨將重整過往過分着重勝出率嘅保守參選策略，改為「大包圍」參選，並游說黨內所有立會議員及大佬「降格」參選區會，包括已棄選區會多年嘅單仲偕、涂謹申同李華明。選區方面，除咗黨主席何俊仁會留守原區，確保佢一定攞到「超級區會」嘅參選入場券，其他大佬亦可能會不計本身輸贏，轉區挑戰建制派嘅星級區議員，谷起選情，幫啲黨內第二梯隊抬轎鋪路，亦為自己參選來屆立會造勢。
好似身兼北區區議員嘅立會議員黃成智，今屆就會轉區挑戰民建聯嘅蘇西智。蘇西智喺○三年擊敗過黃成智，又係現任北區區議會主席，今次兩人再次對決，無論結果係點都有一定睇頭。不過，呢批立會議員同大佬一旦勝出後，能否同時兼顧兩級議會嘅繁重職務，搞到成日要遲到早退甚至唔開會呢！