中環耳目：徐巧嬌演繹自家品牌新裝
幸福女人追求嘅境界無非係老公疼惜，子女生性成才。同老公兼公司主席陳欽杰一齊自創Moiselle高級女裝品牌嘅慕詩國際執行董事徐巧嬌（Shirley），就係十足幸福女人嘅人辦。早前卓妮喺慕詩股東會上，見到Shirley着住件設計別致嘅流蘇短外套，玉手戴住勞力士玫瑰金靚錶，顯得簡潔又新潮。原來外套係囝囝陳栢熹（Harris）設計，而靚錶就係老公送嘅，難怪Shirley洋溢着幸福笑容，愈睇愈年輕。
二子設計 時尚易配搭
Shirley同卓妮講，件衫係Moiselle嘅「The New Look」系列新裝，由擔任集團創作經理嘅二子Harris設計。件外套用一條條流蘇併成，既動感又時尚，又可以任玩配搭。Shirley話，如果出席晚宴，佢會襯件背心裙，咁就可以散發出同白天完全唔同嘅風情。
至於隻勞力士腕錶，係去年金融海嘯時老公趁低吸納送畀佢，價值十幾萬元。Shirley鍾意戴大錶，貪佢方便又有型，率性嘅個人風格表露無遺。