中環出更：陳有慶浸大「扑頭」親友撐場
九月雖然唔似係「扑頭」季節，但浸大一直有個傳統，將開學禮同榮譽院士頒授典禮一齊搞。社聯主席陳智思嘅爸爸、全國僑聯副主席陳有慶，尋日就喺浸大校董會主席王英偉「扑頭」下，正式成為該校榮譽院士。除咗陳家上下齊撐場，佢啲政界好友都畀面到賀。
陳智思尋日同媽媽陳沈時芬、大哥陳智文伉儷及姪女現身，同爸爸分享喜悅，但就笑言未決定點慶祝，事關尋晚浸會安排咗個晚宴。
陳有慶就話自己同浸大好有淵源，九三年起已開始資助該校發展，過去雖然攞過其他榮譽學位，但都唔夠呢個來得親切，佢希望自己仲有多啲機會貢獻社會。
陳有慶相識滿天下，尋日廣東社團總會主席王國強、立法會議員劉健儀、全國政協委員李嘉音、香港僑界社團聯會會長余國春等政界名人都有到賀。
劉健儀話自己十幾年前喺兩會已認識陳有慶，而做過浸大校董嘅佢，仲好感謝對方多年來對浸大嘅貢獻添。
陳新滋請參賽者擦餐勁
尋日亦係浸大校長陳新滋履新後嘅第一個開學禮，佢七月上任時出過一副上聯，揚言將下聯接得最好嘅人可以同佢共進晚膳。
陳新滋尋日自爆共有四十幾個人參加比賽，畀咗文學院教授點評後，覺得大家都寫得好好，所以皆大歡喜月尾請晒佢哋去校長宿舍擦餐勁。不過聽講報名嘅都係同事居多，睇嚟浸大嘅同學要主動啲噃！