中環出更：名人愛名校落本為仔女鋪路
望子成龍、望女成鳳乃人之常情，早兩日卓妮撞到前財爺梁錦松夫婦去聽拔萃男書院附屬小學嘅小一入學簡介會，尋日輪到港島傳統名校聖保羅男女中學附屬小學搞簡介會，見到嘅名人仲多，好似民政事務局副局長許曉暉（Florence）、風之后李麗珊夫婦同前新聞之花黃德如夫婦都有現身。
講開Florence，佢啱啱先同十六名副局政助訪問上海，尋日提前返港，一落機就趕去聖保羅個簡介會，為五歲嘅乖女攞定資料。Florence話，佢嘅心情同其他家長一樣，都係想個女入到好學校，所以安排咗個女學畫畫、彈琴同埋書法。至於一個月用幾多錢培訓個女，佢就耍手擰頭唔肯講，仲不停hard sell話政府好多文娛康樂活動都唔使錢，即使要收費都好平，好似歷史博物館、鐵路博物館等，都好適合家長帶子女去參觀。Florence仲話，佢唔係只揀直資學校，個女都會參加統一派位。
珊珊讚愛女文武雙全
風之后李麗珊同老公黃德森都係呢個入學簡介會嘅座上客，珊珊一身運動裝上陣，黃德森就着恤衫西褲，仲戴埋眼鏡鬼咁斯文。珊珊拍過廣告，話養一個小朋友要四百萬，佢有無用四百萬培育個女就未知，但一定都花盡心機。
珊珊尋日話，個女運動方面應該無問題，因為除咗佢哋兩公婆嘅強項風帆之外，個女仲識游水、划艇、獨木舟，連彈琴、跳舞、音樂都樣樣精，可以話係文武雙全。用佢嘅話說：「媽媽要做嘅嘢我都做晒！」睇嚟做珊珊嘅女都好唔容易，要培養愛女，四百萬都應該唔夠用。
卓妮仲喺簡介會度撞到前新聞之花黃德如同佢嘅醫生老公梁宗存，追問之下先發現佢哋只係K2學生嘅家長，佢話自己提早一年去聽簡介會學吓嘢，真係緊張過緊張大師。聖保羅男女中學附屬小學校長李端儀就話，年年都有唔少名人嘅仔女入讀，但佢哋唔會有優待，學校會一視同仁，睇番個小朋友適唔適合入嚟讀書。
卓妮