銀行梯級難倒傷殘客
一個梯級，便令傷殘人士進出銀行受阻！陳小姐經常往開設於新蒲崗大有街及爵祿街的銀行分行處理帳項事宜，惟每次均被門口的梯級難倒，「呢間銀行唔係間間分行都有傷殘人士設施，有時要喺門口等到有人見到我至辦到手續，真係好唔方便！」
有關銀行發言人指出，部分分行已設有召喚鐘及升降台等設施，現已計劃於上述分行的入口加設召喚鐘，方便有需要人士使用。
堅毅忍者‧障殘人士國際互助協會總幹事王素琴批評不少大型商業機構均漠視傷殘人士的需要，「好似活動式斜板，用就拎出嚟、唔用拎走，呢啲根本係唔阻人、唔使做工程嘅輔助設施，但佢哋都唔肯提供。」王指使用手推輪椅者尚可要求別人協助，但電動輪椅使用者則無法求援，「搞到佢哋連門口都入唔到！」王促大型商業機構帶頭推動無障礙設施。