政情：嶺大動土禮 施文信爆笑彈
香港賽馬會慈善信託基金最近撥咗八千五百萬元畀嶺南大學起新宿舍，嶺大尋日搞咗個動土儀式，除咗校董會主席陳智思同校長陳玉樹之外，新任馬會主席施文信都畀面出席。施文信個樣平時一本正經，其實為人相當風趣，一到場就同班大學生雞啄唔斷咁傾偈，相當親民。
扮嘢自嘲矮仔
除咗冇架子之外，施文信仲相當鬼馬。話說工作人員為咗營造「動土」嘅氣氛，等班嘉賓入座後，即時上前替嘉賓試戴安全帽。點知施文信竟然話唔想戴，怕會整亂個髮型喎。施文信當然係講笑啦，隨即仲主動戴頂帽添。
施文信致辭時亦引爆笑彈，陳智思致辭後冇將個咪架校低，施文信身材較矮，佢上台後即時自嘲，話自己次次上台都要校番低個咪架，對佢嚟講係災難喎。此話一出，即時引起哄堂大笑，睇嚟馬會喺新主席帶領下一定會有新搞作。
講起宿舍，校長陳玉樹透露以前讀學士時住喺港島，每日都要長途跋涉去中大崇基學院返學。當年坐嘅火車仲要燒煤，過隧道後乘客塊面全部黑晒。後來家人建議佢搬去近啲嘅地方，結果就搬咗去學校附近嘅赤泥坪、第二年就住大埔、第三年搬去粉嶺，直到最後一年先可以住宿舍，所以佢好明白學生冇得住宿舍嘅苦況喎。