政情：商界落區「耕田」紓仇富情緒
香港近期瀰漫仇商、仇富情緒，呢個中央治港方略嘅心頭結，解唔解到，好大程度睇本港商界點做。本地四大商會之一、由黃友嘉揸旗嘅香港廠商聯合會，尋日宣布「十八區專業諮詢服務計劃」，組織專業人士落區，全港性幫街坊解決法律同醫藥等疑難，即係落區「耕田」，開拓支持。副會長吳永嘉強調，叫大家咪將新計劃同明年區議會選舉及廠商會立法會代表林大輝嘅新檔口「社區十八」扯上關係。咦？咁即係同幫手紓緩仇商情緒有關啦！
近期陸續傳出，商界有新動作紓緩社會仇商、仇富情緒，好似「田少」田北俊意欲籌辦商界基金協助基層咁，最終搞唔搞得成仲未知，但商界有心出招解仇富結，就係事實。廠商會政治事務委員會專業人士小組尋日設下午宴，邀請一班建築工程同醫療界專業人士出席，原來今次係一場鴻門宴，宣布計劃成立一支專業服務義工隊，展開全港性專業諮詢服務。
小組召集人吳永嘉透露，諮詢服務範圍廣泛，大到舊樓成立業主立案法團，小至市民立遺囑嘅法律問題同健康小常識，都有專業人士為街坊解疑難，連適唔適合生ＢＢ呢類家計會服務，義工隊都有提供，服務一流，義工隊暫時有三十名專業人士加盟，目標去到一百人。本身係律師嘅吳永嘉，將親身上陣服務街坊，與身為眼科醫生嘅哥哥兄弟班落區，席間皮膚科醫生史泰祖亦應承加盟，反應不俗。
否認為「社區十八」造勢
吳永嘉話，義工隊每一個月落一區，做晒十八區，即要一年半時間。一年半？咪係明年區議會選舉開戰時候！吳永嘉叫大家唔好多心，服務街坊，同選舉無關，亦唔係為「社區十八」造勢。再問吳永嘉點睇仇商情緒，佢話，唔好講到仇商咁嚴重，可能市民只係對商界有些少誤會啫，實情係，商界都唔係齋睇住自己嘅利益，一樣都想喺不同方面為社會做啲事咁話。
吳永嘉講到咁，相信佢一定好希望借呢支廠商會專業人士義工隊，加深普羅大眾對工商界嘅了解啦。如果廠商會呢種「落區耕田」模式成功，話唔定唔止有助紓緩社會仇商、仇富情緒，仲可以順勢幫埋廠商會派人選區議會都未定。一雞兩味，相當和味！