中環耳目：胡曉明挺太太爭做女廚神

楊章桂芝秘密練兵

尋日菱電發展（中國）有限公司副董事長胡梁子慧、新華旅遊董事總經理楊章桂芝同沙田區議員龐愛蘭，喺上次班男士比賽嘅中華廚藝學院跟師傅學整甜品，之後又自選紅酒配襯由專業廚師炮製嘅中菜比賽作品，認真係有得玩、有得食。胡太老公菱電發展主席胡曉明（Herman）係香港專業及資深行政人員協會會長，有份籌辦「明火廚神‧國際挑戰賽2010」，所以早早就到場，既支持活動亦支持老婆，一舉兩得！

胡太炮製嘅「水中花」，要將豆腐切到好幼但又唔斷，好考刀功，難怪佢同御苑皇宴尖東店嘅蕭永權師傅贏咗個「最佳合拍獎」。胡太兩個囝囝喺美國讀書，所以好耐無入廚嘅佢自嘲廚藝麻麻。不過佢頭號粉絲Herman就大讚太太廚藝出色又勤力，好畀心機練習過今次嘅甜品好多次。Herman仲爆料，話太太嘅獨門肉醬意粉無人能及，獨有味道將佢嘅心同胃都鎖住。胡太就回敬老公唔難服侍，最鍾意食麵包，一啲都唔嘴刁。

楊太就展示拉糖手藝，跟鴻星海鮮酒家尖沙咀店嘅鍾文波師傅，學整名為「鯉躍河塘」嘅甜品，楊太以前喺澳洲學過烹飪，但今次拉糖要將荷葉同花枝黏埋，又要用火熗，火候控制好困難，所以佢秘密練咗兵幾次，難怪睇佢現場好似做手工藝咁，手勢頗純熟。

龐愛蘭嘅反沙脆皮豆腐就係跟國金軒嘅劉耀鑫師傅學嘅。咪睇龐愛蘭好似十指不沾陽春水咁，其實佢入得廚房，最叻整曲奇，今次做豆腐除咗要外脆內嫩，仲要反沙，真係易學難精，但都難唔倒佢。

楊章桂芝（右）嘅「鯉躍河塘」甜品顯露出楊太嘅精湛拉糖手藝，當然仲要多謝「鴻星」師傅鍾文波指導。	楊章桂芝作品「鯉躍河塘」	龐愛蘭（右）以「反沙脆皮豆腐」參賽，整得有板有眼。
龐愛蘭作品「反沙脆皮豆腐」