中環出更：工總金禧晚宴官紳撐場
香港工業總會尋日傍晚喺會展中心舉行金禧會慶晚宴，慶祝成立五十周年。雖然本港天氣悶熱到令人抖唔到氣，但無阻工業界嘅新知舊雨現身撐場，好多工總歷任主席都齊心現身，包括港鐵主席錢果豐、金山集團主席羅仲榮、立法會議員梁君彥、開達集團董事長丁午壽、生產力促進局主席陳鎮仁等，大家共同見證香港工業嘅興衰和發展。
香港經濟約八成都係金融、零售等服務業，好多人都慨嘆香港工業已經式微，但幾位工總前揸弗人都唔係好認同呢個講法。梁君彥話，依家香港工業界喺中港聘請嘅員工總數仲有七、八百萬人，雖然比起高峰期嘅一千二百萬人係少咗啲，但都算OK啦。
不過，陳鎮仁就覺得工業界面對嘅挑戰依然好大。佢舉例，廣東省起草緊嘅《企業民主管理條例》就幾攞命，事關條例要求港企嘅董事會中，勞工代表要佔三成，咁做對企業運作影響好深遠，所以佢哋過兩日都要派高層去內地參加諮詢會，表達港企關注。工總主席孫啟烈都話，港企面對嘅壓力仲有工資上漲同勞工短缺等問題。
工業家二三代蒲頭
難得係工業界喺困難中依然薪火相傳，尋晚有唔少工業家第二、三代蒲頭，好似丁午壽囝囝丁天立就兩父子現身，立法會議員林健鋒跟隨煲呔曾外訪俄羅斯，囝囝林凱章就陪爺爺林亮出席，不過佢怕醜唔肯出鏡，爺爺叫佢都唔肯制。平時少蒲頭嘅林伯甫出現就有人起哄，錢果豐好恭敬咁叫佢做師傅，笑稱除咗做生意，最緊要學佢點樣做人。
好多高官及工總友好都畀面撐場，好似商務及經濟發展局局長劉吳惠蘭、發展局局長林鄭月娥、環境局局長邱騰華、公務員事務局局長俞宗怡、曾代表工總入立法局嘅田北俊、五十年前入工總嘅全國政協常委陳永棋，仲有中聯辦副主任黎桂康及香港總商會主席胡定旭等。
卓妮