政情：潘佩璆話睇直播小心
香港旅行團喺馬尼拉遭槍手挾持，最終慘被屠殺，唔少市民睇完電視直播都覺得好唔開心，仲有人因為太憂傷要打去紅十字會熱線求助。我哋尋日喺灣仔入境事務大樓撞到工聯會立法會議員潘佩璆，佢趕住去更新本特區護照，遲啲跟立法會兩個事務委員會去日本考察，就醫療融資等問題取經。
潘佩璆本身係聯合醫院精神科顧問醫生，一直十分留意馬尼拉慘劇嘅最新進展，除咗會替枉死嘅港人不值之外，佢最擔心嘅係死者親屬嘅情緒有冇得到適切照顧。
潘醫生以專家口脗話，有啲人遭逢不幸後會出現急性反應，不過創傷後壓力症其實唔一定即時顯現，可以持續成兩個星期後再出現，如果期間得唔到合適照顧，可以令情況惡化。佢仲話，文獻上有記載，喺電視睇住慘劇直播嘅人，喺精神上其實都有機會受創；如果睇完電視持續一排覺得唔安樂，就要即時求醫喇。潘醫生希望死者家屬可以堅強啲，有需要可同佢聯絡，佢都好樂意幫手。